الصحفي السوري عقيل حسين يكتب في مرض الشيخ كريم راجح شيخ مشايخ الشام والعالم الاسلامي بالاقراء

ما بتتخيلوا قسوة الأشهر والسنين إلي قضيناها تحت وطأة التكفير والاتهامات إلي توجهت إلنا وطالت دينا وأخلاقنا بسبب وقوفنا بوجه التكفيرين وجماعة طلقة بالرأس والاغتيالات والدبح والتفجير بحق الابرياء وباسم الدين !
سنوات ما بقي مسبة ما انسبيناها..ما بقي شتيمة بأعراضنا إلا وقالوها..لك حتى أصدقاء وأقارب بل ومقربين جدا إما عادونا وقاطعونا أو صاروا يتجنبونا..
شي صدق بالفعل إنينا كفار مرتدين وكان مستعد هو بنفسو يقتلنا..
وشي خاف مننا متل ما كان الشعب يخاف يقرب أو يحكي مع حدا اتهموا النظام انو اخوان أو عميل !
كنت أتألم اشد الألم شلون هدول الأقارب والاصدقاء والجيران إلي بيعرفونا حق المعرفة كذبونا وصدقوا ناس ما معروف قرعة ابوهون من وين ؟
بس كنت صابر وفهمان أنو هدول عم يستغلوا أقوى عاطفة عند الناس وهي العاطفة الدينية.
وانو عم يجمعوا حواليهون الصغار بالعمر البسيطين المندفعين منشان يربهون عكيفهون ويعملهون خاتم بإبصعهون ويخلوهون يعادوا ويقتلوا حتى أهلون.
بس إلي كان يألمني أكتر أنو شلون هدول الناس تركت مشايخ ربانيين اصحاب علم وعمل وفوقها كانوا من أول المؤيدين للثورة، شلون تركوهون ولحقوا هدول ؟
بالله عليكون حدا بيترك الشيخ كرّيم راجح هاد العالم النوراني صاحب الوجه السمح والابتسامة العذبة والعلم الجليل والموقف الشجاع..وبيلحق ابو يقظان المصري مثلا إلي بتحسوا عم يقطر حقد وغل لدرجة أصدر فتوى لعناصرو يوم قتالهم مع أحرار الشام انو اضربوهون طلقة بالرأس !!
لا وقلهون يوم الحساب إذا الله سألكون قولوا أبو اليقظان قال نعمل هيك !!
في أجرأ من هيك على رب العالمين ؟!!
بشرفكم طلعولي على هالوجهين..هاد شيخ وهاد شيخ ؟!!
طبعا ما عم احكي عن جمال الشكل..
عم أحكي عن الجمال الروحاني إلي ربنا بيفيضو من نورو على وجوه الطيبين حتى لو كانوا قبيحي الشكل..
وبيحرم منو الحاقدين الظالمين اصحاب القلوب المريضة حتى لو كانوا من اجمل الناس.
اللهم أدم صحتك وعافيتك على شيخنا الكريم كرّيم راجح وأطل بعمره..وخلصنا من المدعين ومشايخ الضلال.